រាជធានីភ្នំពេញ៖ ព្រឹកថ្ងៃសុក្រ ០៨រោច ខែស្រាពណ៌ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៣ ខែសីហា ឆ្នាំ២០១៩ នៅវិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មាន(វិទ្យាស្ថានជាតិ NIPTICT) ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍និងទូរគមនាគមន៍ និងជាប្រធានក្រុមប្រឹក្សាភិបាលមូលនិធិនៃការកសាងសមត្ថភាពនិងការស្រាវជ្រាវ និងការអភិវឌ្ឍលើវិស័យទូរគមនាគមន៍បច្ចេកវិទ្យាគមនាគមន៍ និងព័ត៌មាន (ក្រុមប្រឹក្សាមូលនិធិ ស.អ.) បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់បន្ទប់ពិសោធន៍បណ្តាញកុំព្យូទ័រ របស់វិទ្យាស្ថានជាតិ NIPTICT ។ ពិធីនេះមានការអញ្ជើញចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួង ប.ទ. ព្រមទាំងសាស្ត្រាចារ្យ នៃវិទ្យាស្ថានជាតិ។
បន្ទប់ពិសោធន៍បណ្តាញកុំព្យូទ័រ(Networking Lab) ត្រូវបានបង្កើតដោយប្រើប្រាស់មូលនិធិនៃការកសាងសមត្ថភាពនិងការស្រាវជ្រាវនិងការអភិវឌ្ឍលើវិស័យទូរគមនាគមន៍ និងបច្ចេកវិទ្យាគមនាគមន៍និងព័ត៌មាន (មូលនិធិ ស.អ-CBRD Fund) និងក្រោមកិច្ចសហប្រតិបត្តិការរវាងវិទ្យាស្ថានជាតិ NIPTICT និងក្រុមហ៊ុនវៀតថែល (ខេមបូឌា)។ ហើយបន្ទប់ពិសោធន៍នេះនឹងត្រូវប្រើប្រាស់ដើម្បីគាំទ្រដល់ការអប់រំបណ្តុះបណ្តាល ការស្រាវជ្រាវ និងការអភិវឌ្ឍ ផ្នែកបច្ចេកវិទ្យាបណ្តាញកុំព្យូទ័រ និងអុីនធើណេត របស់វិទ្យាស្ថានជាតិ NIPTICT ដែលអនុញ្ញាតិឱ្យនិស្សិតទទួលបាននូវចំណេះធ្វើជាក់ស្តែងក្នុងការតម្លើង ថែទាំ និងគ្រប់គ្រងបណ្តាញកុំព្យូទ័រ និងប្រព័ន្ធអុីនធើណេត។ មិនត្រឹមតែប៉ុណ្ណោះ បន្ទប់ពិសោធន៍នេះនឹងរួមចំណែកជួយបង្កើនចំណេះធ្វើដល់និស្សិតរបស់វិទ្យាស្ថានជាតិ NIPTICT ដើម្បីអាចអោយពួកគេមានជំនាញពិតប្រាកដនឹងឆ្លើយតប តាមតម្រូវការទីផ្សារជំនាញ នៅកម្ពុជា។
ឆ្លៀតក្នុងឱកាសនោះ ឯកឧត្តមរដ្ឋមន្ត្រី បានអញ្ជើញសម្ពោធដាក់ឱ្យប្រើប្រាស់បន្ទប់ពិសោធន៍បណ្តាញកុំព្យូទ័រ និងបានចុះពិនិត្យការដ្ឋានសាងសង់មជ្ឈមណ្ឌលនវានុវត្តន៍ដែលកំពុងសាងសង់នៅក្នុងបរិវេណវិទ្យាស្ថានជាតិផងដែរ។
