នៅថ្ងៃព្រហស្បតិ៍ ១០កើត ខែអាសាឍ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី១១ ខែកក្កដា ឆ្នាំ២០១៩ ឯកឧត្តម កាន ច័ន្ទមេត្តា រដ្ឋលេខាធិការក្រសួងប្រៃសណីយ៍និងទូរគមនាគមន៍ និងជាអនុប្រធានទី១នៃក្រុមប្រឹក្សាមូលនិធិនៃការកសាងសមត្ថភាពនិងការស្រាវជ្រាវ និងការអភិវឌ្ឍលើវិស័យទូរគមនាគមន៍បច្ចេកវិទ្យាគមនាគមន៍និងព័ត៌មាន (ក្រុមប្រឹក្សាមូលនិធិស.អ.) តំណាងដ៏ខ្ពង់ខ្ពស់ ឯកឧត្តម ត្រាំ អុីវតឹក រដ្ឋមន្ត្រីនិងជាប្រធានក្រុមប្រឹក្សាមូលនិធិ ស.អ. បានដឹកនាំកិច្ចប្រជុំត្រៀមរៀបចំព្រឹត្តិការណ៍ Seedstars Asia Summit 2019 ដោយមានការចូលរួមពីធុរកិច្ចចាប់ផ្តើមថ្មីក្នុងវិស័យបច្ចេកវិទ្យា (Tech Startups), អាជីវកម្មពាក់ព័ន្ធ (Tech Related Startups), មន្ត្រីលេខាធិការដ្ឋាននៃក្រុមប្រឹក្សាមូលនិធិ ស.អ., តំណាងវិទ្យាស្ថានជាតិ NIPTICT, អ្នកសារព័ត៌មាន, និងភាគីពាក់ព័ន្ធក្នុងកម្មវិធី Digital Cambodia 2019។ កិច្ចប្រជុំត្រៀមរៀបចំព្រឹត្តិការណ៍ Seedstars Asia Summit 2019 ត្រូវបានរៀបចំឡើងក្នុងគោលបំណងផ្សព្វផ្សាយអំពីការរៀបចំព្រឹត្តិការណ៍ Seedstars Asia Summit 2019 ដែលឆ្នាំនេះកម្ពុជានឹងធ្វើជាម្ចាស់ផ្ទះជាលើកដំបូងនាចុងខែវិច្ឆិកា ឆ្នាំ២០១៩ ក៏ដូចជាដើម្បីប្រមូលធាតុចូលបន្ថែមពី Tech Startups កម្ពុជា និងភាគីពាក់ព័ន្ធក្នុងគោលបំណងធ្វើយ៉ាងណាឱ្យកម្ពុជាអាចទាញប្រយោជន៍ជាអតិប្បរមាពីការធ្វើជាម្ចាស់ផ្ទះក្នុងការរៀបចំព្រឹត្តិការណ៍ថ្នាក់តំបន់នេះ។
គួរបញ្ជាក់ផងដែរថា ព្រឹត្តិការណ៍ Seedstars Asia Summit 2019 គឺជាកម្មវិធីប្រកួតប្រជែងកម្រិតតំបន់និងការបង្ហាញពីសក្តានុពលក្រុមហ៊ុន (Pitching) ដំណាក់កាលពាក់កណ្តាលផ្តាច់ព្រ័ត្រនៃការប្រកួតប្រជែងកម្រិតពិភពលោក (Seedstars Global Summit)។ ព្រឹត្តិការណ៍ Seedstars Regional Summit នេះ នឹងរៀបចំឱ្យមានការជួបជុំគ្នារវាងធុរកិច្ចបង្កើតថ្មីក្នុងវិស័យបច្ចេកវិទ្យា (Tech Startups) មកពីប្រទេសតំបន់អាស៊ីដែលមានទីផ្សារផ្សេងៗគ្នាចំនួន១៨ និងរាល់បុគ្គលដែលចូលរួមបង្កើតនិងជំរុញ Ecosystem នៃធុរកិច្ចបង្កើតថ្មីក្នុងវិស័យបច្ចេកវិទ្យា។ កម្មវិធី Seedstars Regional Summit មានរយៈពេល ០៣ (បី)ថ្ងៃ។ ក្នុងកំឡុង ០២ (ពីរថ្ងៃ) ដំបូង មានកម្មវិធី Bootcamp និងវេទិកាវិនិយោគ ដោយក្នុងនោះ ធុរកិច្ចបង្កើតថ្មីក្នុងវិស័យបច្ចេកវិទ្យានឹងត្រូវទទួលបានការបណ្តុះបណ្តាល, ទទួលឱកាសប្រជុំទ្វេភាគីជាមួយអ្នកណែនាំ (Mentors) និងវិនិយោគិន (Investors) ក្នុងក្របខណ្ឌតំបន់ និងចូលរួមក្នុងកម្មវិធីបង្កើតទំនាក់ទំនង (networking) ផងដែរ។ ចំពោះថ្ងៃទី៣ គឺជាថ្ងៃប្រកួតប្រជែងរវាងធុរកិច្ចចាប់ផ្តើមថ្មីក្នុងវិស័យបច្ចេកវិទ្យា សិក្ខាសាលា និងកិច្ចពិភាក្សា (keynotes/panels) និងកម្មវិធីបង្កើតទំនាក់ទំនង (networking)។
លោក គង់ សូលីយ៉ា សហស្ថាបនិកនៃ Joonaak Delivery ដែលជា Tech Startup កម្ពុជា ចូលរួមប្រកួតប្រជែងវគ្គផ្តាច់ព្រ័ត្រ (Top 12) ក្នុងព្រឹត្តិការណ៍ Seedstars Global Summit នៅទីក្រុង Lausanne នៃប្រទេស Switzerland កាលពីខែមេសា ឆ្នាំ២០១៩ កន្លងមកនេះ បានមានចែករំលែកនូវបទពិសោធន៍និងចំណាប់អារម្មណ៍ចំពោះព្រឹត្តិការណ៍ Seedstars ថា ព្រឹត្តិការណ៍ Seedstars មិនគ្រាន់តែជាការប្រកួតប្រជែងដើម្បីយកជ័យលាភីនោះទេ ប៉ុន្តែព្រឹត្តិការណ៍នេះនឹងផ្តល់ឱ្យអ្នកចូលរួមទទួលបាននូវឱកាសពង្រឹងសមត្ថភាពបន្ថែម បង្កើតបណ្តាញនិងទំនាក់ទំនង និង/ឬ ទទួលបានការផ្តល់ទុនវិនិយោគទៅលើអាជីវកម្មរបស់ខ្លួនផងដែរ។ ក្នុងន័យនេះ លោក ជំរុញឱ្យ Tech Startups កម្ពុជាទាំងអស់ចូលរួមក្នុងព្រឹត្តិការណ៍ Seedstars នាពេលខាងមុខឱ្យបានច្រើន។
ឯកឧត្តមបណ្ឌិត កាន ច័ន្ទមេត្តា បានមានប្រសាសន៍ថា ការរៀបចំព្រឹត្តិការណ៍ Seedstars Asia Summit 2019 មានគោលបំណង ១. ទាក់ទាញវិនិយោគិនបរទេសមកវិនិយោគជាមួយ Tech Startups កម្ពុជា, ២. បង្ហាញអំពីសមត្ថភាពរបស់ Tech startups និង tech startup Ecosystem កម្ពុជា, ៣. គាំទ្រដល់យុវជនដែលមានទេពកោសល្យ (Young Talents) ក្នុងការធ្វើនវានុវត្តន៍ និងចូលរួមបង្ហាញសមត្ថភាពនិងទេពកោសល្យរបស់យុវជនខ្មែរទៅកាន់ពិភពលោក, ៤. សម្របសម្រួលក្នុងការបង្កើតបណ្តាញរវាង Tech startups នឹង Tech startups ក្នុងតំបន់ និង Tech startups ជាមួយវិនិយោគគិន, និង៥. ជំរុញឱ្យ Tech startups កម្ពុជាអាចមានឱកាសពង្រីកខ្លួនបន្ថែម។ ការរៀបចំព្រឹត្តិការណ៍នេះ ត្រូវបានរៀបចំឡើងដោយស្របតាមយុទ្ធសាស្ត្រចតុកោណដំណាក់កាលទី៤ (ការរៀបចំខ្លួនសម្រាប់សេដ្ឋកិច្ចឌីជីថល និងឆ្លើយតបនឹងបដិវត្តន៍ឧស្សាហកម្មទី៤) របស់រាជរដ្ឋាភិបាលក្រោមការដឹកនាំដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជណាចក្រកម្ពុជា។ ឆ្លៀតក្នុងឱកាសនេះផងដែរ ឯកឧត្តម បានលើកទឹកចិត្តនិងជំរុញឱ្យ Tech startups កម្ពុជាចូលរួមប្រកួតប្រជែងក្នុងកម្មវិធី Seedstars Phnom Penh នាថ្ងៃទី១០ ខែតុលា ឆ្នាំ២០១៩ ដើម្បីចាប់យកឱកាសចូលរួមប្រកួតប្រជែងក្នុងព្រឹត្តិការណ៍ Seedstars Asia Summit 2019 និង Seedstars Global summit 2020 ដើម្បីបន្តដាក់បង្ហាញកម្ពុជានៅលើផែនទីពិភពលោកនៃ tech startups ដូចនៅឆ្នាំ២០១៩៕
