រាជធានីភ្នំពេញ៖ វិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍ និងព័ត៌មាន ហៅកាត់ថា និបទីក (NIPTICT) និងក្រុមហ៊ុន Kepstar Data Centre Management បានរៀបចំ សិក្ខាសាលាស្តីពីការបំលាស់ប្តូរទៅកាន់យុគសម័យឌីជីថល ជាមួយនឹងបច្ចេកវិទ្យា Internet of Things (IoT), Artificial Intelligence (AI), Big Data, និង Cloud Computing ជាលើកដំបូង របស់ខ្លួននៅសណ្ឋាគារ Raffles Hotel Le Royal នាថ្ងៃទី២២ ខែឧសភា ឆ្នាំ២០១៨ ដែលមានការគាំទ្រដោយក្រសួងប្រៃសណីយ៍ និងទូរគមនាគមន៍ និងចូលរួមឧបត្ថម្ភដោយ ក្រុមហ៊ុន Fourtitude.asia, ក្រុមហ៊ុន តែ អៀកហុង និងក្រុមហ៊ុន Smart Axiata ដោយប្រើប្រាស់កញ្ចប់ថវិការបស់មូលនិធិនៃការកសាងសមត្ថភាព និងការស្រាវជ្រាវ និងការអភិវឌ្ឍ លើវិស័យទូរគមនាគមន៍ និង បច្ចេកវិទ្យាគមនាគមន៍ និងព័ត៌មាន (មូលនិធិស.អ.) និងមានអ្នកចូលរួមប្រមាណ ២០០នាក់មកពីក្រសួងពាក់ព័ន្ធ ធនាគារ គ្រឹះស្ថានមីក្រូហិរញ្ញវត្ថុ ប្រតិបត្តិករទូរគមនាគមន៍ ក្រុមហ៊ុនផ្តល់សេវាកម្មបច្ចេកវិទ្យា គមនាគមន៍និងព័ត៌មាន (ICT) ក្រុមហ៊ុន ចាប់ផ្តើមធុរកិច្ចថ្មី អង្គការក្រៅរដ្ឋាភិបាល គ្រឹះស្ថានអប់រំ ដៃគូអភិវឌ្ឍន៍ និងនិស្សិត។
ការរីកចម្រើនដ៏ឆាប់រហ័សក្នុងវិស័យ ICT នាពេលបច្ចុប្បន្ន និងទៅអនាគត ជាពិសេសចំពោះ បច្ចេកវិទ្យា IoT, AI, Big Data, និង Cloud Computing បានក្លាយជាចលករយ៉ាងសំខាន់ ក្នុងការអភិវឌ្ឍវិស័យសេដ្ឋកិច្ចនិងសង្គម ព្រមទាំងបានដើរតួនាទីមិនអាចខ្វះបានក្នុងការសម្រេចចិត្ត នៅក្នុងវិស័យពាណិជ្ជកម្មនិងអាជីវកម្ម។ សិក្ខាសាលានេះរៀបចំឡើងក្នុងគោលបំណងផ្លាស់ប្តូរ និងផ្ដល់ឱកាសដល់អ្នកចូលរួមឱ្យទទួលបានចំណេះដឹង បទពិសោធន៍និងភាពជោគជ័យនៅក្នុងការងាររបស់វាគ្មិន ដែលមកពីស្ថាប័នរដ្ឋាភិបាល វិស័យឯកជន ឧស្សាហកម្មពាក់ព័ន្ធនឹងវិស័យ ICT តាមរយៈការទាញយកអត្ថប្រយោជន៍ពីការប្រើប្រាស់បច្ចេកវិទ្យាទាំងនោះ។ ជាពិសេស សិក្ខាសាលានេះនឹងបង្កើតបានជាវេទិកាជជែកពិភាក្សា ចែករំលែកបទពិសោធន៍រវាងវាគ្មិន និងអ្នកជំនាញលើវិស័យ ICT ដើម្បីប្រមូលនូវធាតុចូលសម្រាប់រៀបចំផែនការសកម្មភាពអភិវឌ្ឍន៍វិស័យ ICT នៅកម្ពុជានាពេលខាងមុខក្នុងការត្រៀមរៀបចំកម្ពុជាឆ្ពោះទៅរកសេដ្ឋកិច្ចឌីជីថល។
ឯកឧត្តម ត្រាំ អុីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានមានប្រសាសន៍ពេលបើកអង្គសិក្ខាសាលាថា ដើម្បីសម្រេចឲ្យបាននូវអនាគតប្រទេសកម្ពុជាក្នុងការបំលាស់ប្ដូរទៅកាន់ឌីជីថល ចំណុចអាទិភាពចំនួន ៤ ដែលក្រសួងប្រៃសណីយ៍និងទូរគមនាគមន៍កំពុងផ្ដោតសំខាន់ជាសំខាន់នោះ គឺ១) រដ្ឋាភិបាលឌីជីថល និងបញ្ហាសន្តិសុខលើវិស័យបច្ចេកវិទ្យាគមនាគមន៍ និងព័ត៌មាន (ICT) ២) សេដ្ឋកិច្ចឌីជីថល ៣) ការវិនិយោគលើវិស័យបច្ចេកវិទ្យាគមនាគមន៍និងព័ត៌មាន (FDI) និង (៤) ការអភិវឌ្ឍធនធានមនុស្សឆ្ពោះទៅកាន់ ឌីជីថល។ ឯកឧត្តម បានផ្តល់អនុសាសន៍ ពីការរំលងនូវនីតិវិធី និងបច្ចេកវិទ្យាចាស់ៗ (Leapfrog) ដោយដាក់ឱ្យប្រើប្រាស់នូវបច្ចេកវិទ្យាថ្មីៗ ដើម្បីបំព្រួញពេលវេលា ក្នុងការធ្វើបំលាស់ប្តូរទៅកាន់ឌីជីថលនេះ ជាពិសេសសារៈសំខាន់ក្នុងការធ្វើកិច្ចសហប្រតិបត្តិការរវាងស្ថាប័នរដ្ឋ វិស័យឯកជន និងអ្នកពាក់ព័ន្ធក្នុងផ្នែកឧស្សាហកម្ម ICT។
ឯកឧត្តមបណ្ឌិត សេង សុភាព ប្រធានវិទ្យាស្ថានជាតិNIPTICT បានមានប្រសាសន៍ថា សិក្ខាសាលានេះ មានសារៈសំខាន់យ៉ាងខ្លាំងដល់ការជួយជំរុញកម្ពុជាឆ្ពោះទៅកាន់ឧស្សាហកម្មជំនាន់ ៤.០ តាមរយៈការពិភាក្សានិងចែករំលែកបទពិសោធន៍ពីអ្នកជំនាញជាតិនិងអន្តរជាតិដើម្បីឈានទៅបង្កើតនូវ បរិស្ថានអំណោយផលសម្រាប់ការបំលាស់ប្តូរទៅកាន់ឌីជីថលនៅកម្ពុជា ដែលនឹងជះឥទ្ធិពលជាវិជ្ជមានដល់វិស័យសេដ្ឋកិច្ច និងសង្គម តាមរយៈការនាំមកនូវគំរូអាជីវកម្មដែលមានលក្ខណៈនវានុវត្តន៍ ការបង្កើនលទ្ធភាពប្រកួតប្រជែង ការបង្កើតការងារកាន់តែច្រើនដើម្បីជំរុញកំណើនសេដ្ឋកិច្ចជាតិ។
ក្នុងឱកាសសង្ខេបនូវការពិភាក្សា និងថ្លែងសុន្ទរកថាបិទសិក្ខាសាលានេះ ឯកឧត្តម បណ្ឌិត កាន ច័ន្ទមេត្តា រដ្ឋលេខាធិការក្រសួងប.ទ. និងជាអនុប្រធានទី១នៃក្រុមប្រឹក្សាមូលនិធិស.អ. បានលើកឡើងថា សិក្ខាសាលាពេញមួយថ្ងៃនេះជាសិក្ខាសាលាទី៣ ដែលពាក់ព័ន្ធនឹង Tech Startups and MSMEs ដែលបានធ្វើកន្លងមក ។ ដោយបច្ចុប្បន្នព្រះរាជាណាចក្រកម្ពុជាមានអ៊ិនធឺណិតល្បឿនលឿនហើយ ដូច្នេះការប្រើប្រាស់អ៊ិនធឺណិតក៏មានការកើនឡើងដែរ ដែលជាពេលវេលាមួយដែលយើងត្រូវគិតគូរអំពី Internet of Things, Artificial Intelligence, Big Data, និង Cloud Computing ដែលបច្ចេកវិទ្យាទាំងនេះមានសក្កដានុពលយ៉ាងខ្លាំងដល់ការចាប់ផ្តើម និងពង្រីកអាជីវកម្ម (Startup and Scaling up)។
ឯកឧត្តម បានបន្តទៀតថា Tech Startups and MSMEs គឺជាទីផ្សារសម្រាប់អ្នកមានជំនាញបច្ចេកវិទ្យា។ ហេតុនេះដើម្បីអាចជ្រៀតចូលក្នុងទីផ្សារនេះបានយើងចាំបាច់ត្រូវឱ្យមាន ១. ធនធានមនុស្សនិងកម្លាំងយុវជនប្រកបដោយជំនាញ ២. ការអប់រំមូលដ្ឋានផ្នែកបច្ចេកវិទ្យា និង ៣. ឱកាសក្នុងការបង្កើតការងារនាពេលអនាគត។ ក្នុងន័យដើម្បីឱ្យសម្រេចបានគោលបំណងខាងលើ យើងត្រូវរៀបចំគោលនយោបាយជាក់លាក់ដើម្បីបញ្ជ្រាបការយល់ដឹងដល់សិស្សានុសិស្សចាប់ពីពេលនេះតទៅ រហូតដល់ឆ្នាំ២០៣០ ដោយយកចិត្តទុកដាក់លើការបង្រៀនមុខវិជ្ជា វិទ្យាសាស្រ្ត បច្ចេកវិទ្យា វិស្វករ និងគណិតវិទ្យា (STEM) និងមុខវិជ្ជា ប.គ.ព. (ICT) ចាប់ពីថ្នាក់បឋមសិក្សាទៅ។ យើងរៀបចំការបញ្ជ្រាបការយល់ដឹងនេះគឺដើម្បីឱ្យអ្នកដែលពុំទាន់មានជំនាញ ឬមានជំនាញទាបនៅឡើយពិចារណាលើការអភិវឌ្ឍខ្លួនជាស្រេចដើម្បីត្រៀមខ្លួននៅពេលដែលបច្ចេកវិទ្យាអាចធ្វើការជំនួសមនុស្សបាននាពេលអនាគត។
